«Երիտասարդական նախաձեռնությունների կենտրոն» հասարակական կազմակերպությունը հրավիրում է Արմավիրի, Տավուշի, Լոռու, Շիրակի, Սյունիքի և Գեղարքունիքի մարզերի 24 համայնքների երիտասարդական ոլորտի ու տեղական ինքնակառավարման մարմինների (ՏԻՄ) ներկայացուցիչների՝ մասնակցելու 50/50 ձևաչափով երիտասարդական տեղական քաղաքականություն թեմայով դասընթացի, որը կազմակերպվում է «Երիտասարդները գործելիս. Հայաստանում երիտասարդների զորեղացման և առաջնորդության խթանման» ծրագրի շրջանակներում: 

Դասընթացի նպատակն է նպաստել Հայաստանում համայնքային երիտասարդական քաղաքականությունների մշակմանը՝ երիտասարդական կառույցների և համայնքային իշխանությունների կարողությունների համատեղ զարգացման (50/50 ձևաչափով) միջոցով։ 

Դասընթացը անդրադառնում է հիմնական երկու թեմաների՝ երիտասարդների մասնակցություն և երիտասարդական քաղաքականություն։

Ինչ սպասել դասընթացից․

• Համայնքում երիտասարդական տեղական քաղաքականության մշակման և իրականացման տեսական գիտելիքներ  ու կիրառելի հմտություններ։
• Ներհամայնքային և միջհամայնքային կապերի ստեղծման, համախոհների և հավասարակիցների միջավայրում փորձի փոխանակման հնարավորություն:
• Երիտասարդական ոլորտի երկարամյա փորձառություն ունեցող մասնագետների կողմից մշակված ոչ ֆորմալ ուսուցման մեթոդաբանությամբ ու մոտեցումներով կրթական ծրագիր:

Ովքեր կարող են դիմել․

Դիմում հայտը պետք է ներկայացնել համայնքի անունով՝ հայտի մեջ միաժամանակ ներառելով առաջադրվող երկու մասնակիցների՝ երիտասարդական ոլորտի ներկայացուցչի և ՏԻՄ ներկայացուցիչի անուններն ու տվյալները:

Դիմելուց առաջ անհրաժեշտ է ձեռք բերել փոխադարձ պայմանավորվածություն՝ դասընթացի ընթացքում և դրա ավարտին համատեղ մեկ համայնքի անունից հանդես գալու համար:

Երիտասարդական ոլորտի ներկայացուցչը պետք է՝

• Լինի 16-30 տարեկան, 
• Բնակվի տվյալ համայնքում,
• Անդամակցի համայնքում գործող երիտասարդական ակտիվ խմբի, երիտասարդական կազմակերպության, երիտասարդական խորհրդի կամ այլ երիտասարդական կառույցի։

Տեղական ինքնակառավարման մարմնի (ՏԻՄ) ներկայացուցիչը պետք է՝

• Լինի 18 և ավելի տարեկան,
• Ի պաշտոնե պատասխանատու լինի համայնքում երիտասարդական հարցերի համար,
• Հանդիսանա  համայնքապետարանի աշխատակից, վարչական ղեկավար կամ ավագանու անդամ։

Երբ․ Դասընթացն անցկացվելու է երկու խմբով. յուրաքանչյուր խմբում ընդգրկվելու են 12 համայնք՝ երկուական ներկայացուցիչներով:

Առաջին խումբ: Հունիսի 27-ից 30-ը

Երկրորդ խումբ։ Հուլիսի 17-ից 20-ը։

*Մասնակիցների բաշխումը խմբերի կիրականացվի կազմակերպիչների կողմից՝ հաշվի առնելով դիմորդների աշխարհագրությունը։

Որտեղ. Դասընթացի վայրը ենթակա է վերջնական հաստատման։ 

Մասնակիցները կհյուրընկալվեն երկտեղանոց և երեք տեղանոց սենյակներում։

* Մասնակցությունն անվճար է։ Մասնակիցների սննդի, կեցության և տրանսպորտային ծախսերը հոգում են կազմակերպիչները: 

** Դասընթացի մասնակիցներին կտրամադրվի մասնակցության հավաստագիր։

Դիմելու կարգը․

Դասընթացին մասնակցելու համար անհրաժեշտ է լրացնել առցանց գրանցման հայտը։ Գրանցվելու վերջնաժամկետն է հունիսի 8-ը, ժամը` 23:59-ն:

Հարցերի և մանրամասների դեպքում, կարող եք կապ հաստատել դասընթացի համակարգող Մարգարիտա Գրիգորյանի հետ՝ գրելով margarit.grigoryan@yic.am  էլեկտրոնային հասցեին, կամ զանգահարելով ԵՆԿ ՀԿ գրասենյակ 095 91 91 97 հեռախոսահամարով (երկուշաբթիից ուրբաթ, ժամը 10։00-ից մինչև 17։00-ն)։

«Երիտասարդները գործելիս. Հայաստանում երիտասարդների զորեղացման և առաջնորդության խթանման» ծրագիրը Եվրոպական միության և Կոնրադ Ադենաուեր հիմնադրամի կողմից ֆինանսավորվող նախաձեռնություն է, որն իրականացվում է Վորլդ Վիժն Հայաստանի, Մեդիա նախաձեռնությունների կենտրոնի և Գյումրու «Երիտասարդական նախաձեռնությունների կենտրոն»–ի հետ համատեղ: