ՅՈՒՆԻՍԵՖ-ի հայաստանյան ներկայացուցիչ Քրիստինե Վայգանդը շնորհակալություն հայտնեց ծրագրի մասնակից երիտասարդներին ծրագրերը հաջողությամբ մինչև վերջ իրականացնելու համար՝ չնայած վերջին ժամանակների խոչընդոտների: Նա նաև նշեց UPSHIFT ծրագրի կարևորությունը՝ որպես ոչ-ֆորմալ կրթության հնարավորություն երիտասարդների համար:

Հայաստանում ԵՄ դեսպան Անդրեա Վիկտորինը ողջունեց ծրագրի մասնակիցներին և ընդգծեց, որ երիտասարդների զարգացումը, նրանց կրթությունն ու գաղափարների իրագործումն իրենց առաջնահերթություններից են: Դեսպանը կարևորեց ծրագրին մասնակցած երիտասարդների դերը Հայաստանի կայուն ապագայի ձևավորման մեջ:

Ողջունելով միջոցառման մասնակիցներին՝ ԿԳՄՍ նախարարի տեղակալ Արթուր Մարտիրոսյանն ընդգծեց, որ այս ծրագիրը մարզային գործընկերության հիանալի օրինակ է, և պետական երիտասարդական քաղաքականության տեսանկյունից առաջնահերթ են հենց մարզաբնակ երիտասարդների կարողությունների զարգացումը, նրանց համար համապատասխան միջավայրի ձևավորումը:

Գյումրու «Երիտասարդական նախաձեռնությունների կենտրոն» ՀԿ-ի խորհրդի նախագահ Արթուր Նաջարյանը նախքան ներկաներին ողջունելը խնդրեց 1 րոպե լռությամբ հարգել պատերազմում նահատակված հերոսների հիշատակը։

Այնուհետև նա հավատացրեց, որ առավել քան այս օրերին պետք է համայնքներում իրականացվեն նմանատիպ ծրագրեր, քանի որ դրանք հնարավորություն են տալիս երիտասարդներին լինել իրենց համայնքում թև և թիկունք, լինել նախաձեռնող, խնդիրներ բարձրացնող և լուծման ուղիներ փնտրող և գտնող:

Հաջորդիվ տեղի ունեցավ մասնակից երիտասարդների գաղափարների և ձեռքբերումների մասին պատմող հակիրճ տեսանյութի ցուցադրություն, որից հետո մասնակիցները ավելի մանրամասն պատմեցին համայնքային նախագծերի իրականացման մասին: «UPSHIFT Իջևան» ծրագրի արդյունքում մասնակիցները զարգացրեցին իրենց համայնքի մարտահրավերները բացահայտելու, սոցիալական ու ձեռնարկատիրական լուծումներ փորձարկելու կարողությունները, սովորեցին խնդիրների լուծման և քննադատական մտածողության, հաղորդակցության, կազմակերպչական գործընթացների կառավարման և 21-րդ դարի այլ հմտություններ: Միջոցառումն ավարտվեց շնորհակալագրերի հանձնման արարողությամբ:

*«UPSHIFT Գավառ և Իջևան» դեռահասների զարգացման համայնքային ներգրավվածության ծրագիրն իրականացնում է Գյումրու «Երիտասարդական նախաձեռնությունների կենտրոն» ՀԿ-ն Յունիսեֆի հայաստանյան գրասենյակի հետ համատեղ Եվրոպական միության աջակցությամբ: