Վանաձորում պաշտոնապես բացվեց «Ընտանիքի անկյուն» ռեսուրսային կենտրոն:

Վանաձորի «Ընտանիքի անկյուն»-ը կծառայի հարթակ երիտասարդ կանանց ու տղամարդկանց համար, որտեղ կանցկացվեն թեմատիկ հանդիպումներ, դասընթացներ և միջոցառումներ՝ ուղղված կանանց ու տղամարդկանց դերերի վերաբերյալ կարծրատիպերի փոփոխմանը, երեխայի խնամքի ու ծնողավարման մեջ տղամարդկանց ներգրավվածության մեծացմանը։

 Բացման պաշտոնական արարողությանը ներկա էին մարզային և տեղական ինքնակառավարման մարմինների ներկայացուցիչներ, մարզի առողջապահության ոլորտի առաջատար մասնագետներ, ՄԱԿ-ի Բնակչության հիմնադրամի, «ՄԱԿ Կանայք» կազմակերպության և Գյումրու «Երիտասարդական նախաձեռնությունների կենտրոնի» թիմի անդամներ ու հասարակական կազմակերպության ներկայացուցիչներ:

 Ողջույնի խոսքով հանդես եկան ՄԱԿ-ի Բնակչության հիմնադրամի հայաստանյան գրասենյակի ղեկավար Ծովինար Հարությունյանը, Գյումրու «Երիտասարդական նախաձեռնությունների կենտրոն» ՀԿ-ի նախագահ Արթուր Նաջարյանը, ՀՀ Լոռու մարզպետարանի գլխավոր քարտուղար Կամո Աշրաֆյանը, «ՄԱԿ Կանայք» կազմակերպության փորձագետ Մադլեն Սանդսթրոեմը և այլոք։

 ՄԱԿ-ի Բնակչության հիմնադրամի հայաստանյան գրասենյակի ղեկավար Ծովինար Հարությունյանը, կարևորելով կանանց ու տղամարդկանց իրավահավասարությունը, նշեց, որ թեպետ վերջին տարիներին Հայաստանում հայրերի՝ երեխայի խնամքում ավելի մեծ ներգրավվածության միտում կա, սակայն իրականությունը դեռ հեռու է բավարար լինելուց, և անելիք դեռ շատ կա։

 Անդրադառնալով «Ընտանիքի անկյուն» ռեսուրսային կենտրոնի ստեղծման նպատակներին՝ Գյումրու «Երիտասարդական նախաձեռնությունների կենտրոն» ՀԿ-ի նախագահ Արթուր Նաջարյանն ասաց, որ կենտրոնի թիմը լիահույս է, որ «Ընտանիքի անկյունը» լինելու է ապահով և հարմարավետ հարթակ ինչպես երիտասարդ կանանց և տղամարդկանց, այնպես էլ Վանաձորում գործող պետական ու հասարակական կառույցների կողմից տարբեր նախաձեռնություների և միջոցառումների անցկացման համար։

 Լոռու մարզպետ Արամ Խաչատրյանի անունից ներկաներին ողջույնի խոսք ասաց Կարեն Աշրաֆյանը, կարևորելով նմանատիպ կենտրոնների դերը հասարակության մեջ, ասաց, որ Ընտանիքը պետության հիմքն է և մշտապես գտնվում է պետության պաշտպանության ու հոգածության ներքո։ Մենք պատրաստակամ ենք աջակցելու այսպիսի կենտրոնների գործունեությանը ու զարկ տալու ամուր և առողջ ընտանիքների ստեղծմանը,-ասաց նա։

 Միջոցառումը եզրափակվեց «Հայրիկները կարևոր են» ցուցապաստառների մրցույթի արդյունքների ներկայացմամբ։ Հաղթողներ Աննա Խաչատրյանը և Ժաննա Ալեքսանյանը պարգևատրվեցին պատվոգրերով և դրամական պարգևներով։

 «Ընտանիքի անկյուն»-ը հիմնադրվել է Գյումրու «Երիտասարդական նախաձեռնությունների կենտրոն» ՀԿ-ի և ՄԱԿ-ի Բնակչության հիմնադրամի կողմից՝ Եվրոպական միության ֆինանսավորմամբ իրականացվող «ԵՄ-ն հանուն կանանց և տղամարդկանց իրավահավասարության» եռամյա տարածաշրջանային ծրագրի շրջանակներում։
Մինչ 2022 թվականի մարտ «Ընտանիքի անկյուն» ռեսուրսային կենտրոն կբացվի նաև Տավուշի մարզում։

«ԵՄ-ն հանուն կանանց և տղամարդկանց իրավահավասարության» տարածաշրջանային եռամյա ծրագիրը մեկնարկել է 2020 թվականին և իրականացվում է Արևելյան գործընկերության 6 երկրներում։ Հայաստանում ծրագիրն իրականացնում է ՄԱԿ-ի Բնակչության հիմնադրամը՝ Եվրամիության թիրախ երեք մարզերում՝ Շիրակ, Լոռի, Տավուշ։