«Երիտասարդական նախաձեռնությունների կենտրոնը», որպես երիտասարդության հարցերով զբաղվող հասարակական կազմակերպություն, միանում է հանրային պահանջին, այն է՝ ձեռնարկել քայլեր Արցախի (Լեռնային Ղարաբաղի) քսան օրից ավել տևող շրջափակումն անհապաղ դադարեցնելու համար։ 

2022 թվականի դեկտեմբերի 12-ի առավոտյան ադրբեջանական կողմը բնապահպանական կեղծ պատրվակներով փակել է Բերձորի (Լաչինի) միջանցքը, որն Արցախը Հայաստանի և արտաքին աշխարհի հետ կապող միակ ճանապարհն է: Չկա ոչ ցամաքային, ոչ օդային, ոչ ջրային այլ ճանապարհ։

Ադրբեջանական գործողությունների հետևանքով Արցախի ողջ բնակչությունը հայտնվել է հումանիտար ճգնաժամի մեջ, նրանց կյանքը սպառնալիքի տակ է.

• Իզոլացման մեջ է ավելի քան 120.000 մարդ, որից 30 000-ը երեխաներ են, 
• Խախտված է ավելի քան 120.000 մարդու ազատ տեղաշարժի իրավունքը, 
• 1.100 քաղաքացի, որից 270-ը անչափահաս, տուն վերադառնալու հնարավորություն չունի,
• Հազարավոր երեխաներ ու երիտասարդներ զրկված են իրենց կրթության իրավունքից,
• Հայաստանից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ: Տրանսպորտային ամբողջական շրջափակումը սպառնում է սննդի, դեղորայքի և վառելիքի պակասով:

#RoadOfLife #openArtsakh